Қазақстанда енді еңбек шарттарының орнына ГПХ қолдануға болмайды

Сенат еңбек құқықтарын қорғауды күшейтуге бағытталған заңды қабылдады. Жаңа заңға сәйкес, азаматтық-құқықтық шарттарды (ГПХ) енді еңбек шарттарының орнына қолдануға болмайды, деп хабарлайды Ait Media.

Бұл туралы ҚР Парламенті Сенаты аппаратының басшысы Максим Споткай мәлімдеді.

Құжатқа сәйкес, егер азаматтық-құқықтық шарттар іс жүзінде еңбек қатынастарын реттесе, оларды қолдануға тыйым салынады. Мұндай қатынастардың белгілеріне мыналар жатады:

• белгілі бір мамандық немесе лауазым бойынша жұмыс істеу;
• жұмысты жеке орындау және компанияның ішкі тәртібіне бағыну;
• еңбекақыны нақты нәтиже үшін емес, еңбек процесі үшін алу.

Оған қоса, 14 жасқа дейінгі баласы бар жалғызбасты ата-аналарды жұмыс берушінің бастамасымен жұмыстан шығаруға тыйым салынады. Бұл шектеу штат қысқарту немесе өндіріс көлемінің азаюы жағдайында да қолданылады.

Сонымен қатар, заңда келесі ережелер қарастырылған:

• келісім комиссияларының жұмысына тәуелсіз делдал тарту мүмкіндігі енгізіледі;
• ереуілдер кезінде тараптар қауіпті өндірістік нысандарда ең төменгі қажетті жұмыс көлемін қамтамасыз етуге міндетті;
• жазатайым оқиғаларды тергеу комиссиясының құрамы кеңейтіліп, оған адвокат, жұбайы немесе заңгер кеңесші қатыса алады;
• жазатайым оқиғалар кезінде қызметкердің кінә деңгейі 25%-дан аспауы тиіс.

“Заңды қабылдау қызметкерлердің әлеуметтік қорғалу деңгейін арттыруға, еңбек қатынастарының ашықтығын қамтамасыз етуге және еңбек дауларының санын азайтуға мүмкіндік береді” - деп қосты ҚР Парламенті Сенаты аппаратының басшысы хабарламасында.