Алматы облысында ЖИ көмегімен ашылған қылмыстар саны 2,1 есе артты

Алматы облысында жасанды интеллект көмегімен қылмыстардың ашылуы 2,1 есе артты, деп хабарлайды Ait Media.

Қазір бейнеаналитика өңірде қылмыстарды ашуға көмектесетін негізгі құралдардың бірі саналады. Аяқталған қылмыстық істердің 31,7%-ында бейнежазбалар дәлел жинауға көмектескен.

Бұл туралы Алматы облысының әкімдігі мен Sergek Group компаниясы Астанада өткен Kazakhstan Prevention Days – Astana 2026 көрмесінде мәлімдеді. Көрмеде жасанды интеллектіні құқық бұзушылықтардың алдын алу үшін қолданатын жобалар таныстырылды.

Sergek Group компаниясының Алматы облысындағы жоба жетекшісі Евгений Даниловтың айтуынша, қазір өңірде 325 Sergek 4.0 аппараттық-бағдарламалық кешені, 10 мобильді Sergek Patrol Box кешені және 9 мыңнан астам бейнебақылау камерасы бір жүйеге біріктірілген. Оның ішінде 2 500-ден астамы қоғамдық қауіпсіздік нысандарында орнатылған.

«Sergek AI Platform камералардан түскен ақпаратты талдап, полицияның жұмысын жеңілдетеді. Жүйе адамның сыртқы белгілері бойынша іздеу жүргізе алады. Сондай-ақ көліктің маркасын, моделін, түсі мен мемлекеттік нөмірін анықтайды. Бұдан бөлек, төбелес, адамдардың көп жиналуы және тыйым салынған аумаққа кіру сияқты оқиғаларды тіркейді.

Бұл мәліметтер жедел басқару орталықтарына бірден түседі. Соның арқасында полиция оқиғаға уақытылы әрекет етіп, құқық бұзушыларды жедел анықтай алады», – деді Евгений Данилов.

Жасанды интеллект жол қауіпсіздігіне де көмектеседі. 2026 жылдың алғашқы тоғыз айында Алматы облысында жол-көлік оқиғаларынан қаза тапқандар саны өткен жылдың осы кезеңімен салыстырғанда 30%-ға жуық азайды. 2025 жылы тоғыз айда 275 адам қаза тапса, биыл 194 адам көз жұмған.

Sergek AI Platform жолдағы қауіптерді алдын ала бағалауға да мүмкіндік береді. Жүйе бұрын болған жол-көлік оқиғалары, көлік ағыны, ауа райы және күнтізбедегі оқиғалар туралы деректерді талдайды. Осы мәліметтер арқылы апат қаупі жоғары учаскелерді анықтап, патрульдік экипаждарды қай жерге орналастыру тиімді екенін ұсынады.

Kazakhstan Prevention Days – Astana 2026 көрмесінде таныстырылған жоба жасанды интеллектіні қоғамдық және жол қауіпсіздігін қамтамасыз етуге қолданудың нақты мүмкіндіктерін көрсетті. Қазақстандық мамандар әзірлеген технологиялар құқық бұзушылықтарды анықтауға және олардың алдын алуға көмектеседі.