Саясаткер Төлен Тоқтасынов туралы балаcы деректі фильм түсірді

YouTube желісінде қазақстандық саясаткер Төлен Тоқтасынов туралы деректі фильм жарияланды. Картинаны оның ұлы Алихан Мухамеди мен режиссер Аяжан Тулеуова түсірді, деп хабарлайды Ait Media.

«Асқар тауым — асыл әкешім» атты фильм автордың айтуынша, әкенің бейнесін кеңірек ашып, оның түрлі қырларын көрсетуге арналған. Деректі фильм желіге 2026 жылғы 24 наурызда жарияланған.

Фильмнің басында Алихан Мухамеди бұл туындының мақсаты туралы әсерлі сөз айтады:

«Бұл фильм — әкем туралы. Мен үшін әр сенбі-жексенбі — біз бірге өткізген уақыт. Әкем мен үшін үлгілі отбасы адамы ретінде есімде. Бірақ оның басқа да қырларын көрсеткім келеді. Сондықтан біз осы деректі фильмді түсіруді шештік. Себебі, бұл — әкемді бір сәтке болса да қайтара алатын мүмкіндік».

Сипаттамада сондай-ақ мынадай алғыс сөздер жазылған:

«Ең басты алғыс — біздің әкемізге. Бақытты балалық шағымыз үшін, дана кеңестері үшін және бізді өмірде басымызды тік ұстап жүруге үйреткені үшін. Бұл фильм — біздің алғысымыздың кішкентай ғана бөлігі».

Төлен Тоқтасынов — мәжіліс депутаты, Қазақстан Компартиясы ОК хатшысы болған, сондай-ақ 2000-жылдардың басында «Демократиялық таңдау» қозғалысының негізін қалаушылардың бірі. Саяси ортада ол 2001 жылғы резонансты мәлімдемесінен кейін «депутат-камикадзе» деген атаумен танылды.

Фильмде саясаткердің достары, әріптестері мен серіктестері естеліктерімен бөліседі. Олардың қатарында Болат Әбілов, Нұрлан Өнербаев, Ермұрат Бапи және басқалар бар.

Еске сала кетейік, Төлен Тоқтасынов 2024 жылдың қазан айында ұзаққа созылған аурудан кейін қайтыс болды. Ол кезде 61 жаста еді, 9 қазанда 62 жасқа толар еді.

Деректі фильм YouTube-та көруге қолжетімді.

Желі қолданушылары деректі фильмге жылы пікір білдіруде. Көпшілік Төлен Тоқтасынов-ты «нағыз патриот», «елдің мақтанышы», «тарихта із қалдырған тұлға» деп атап, оның жарқын бейнесін еске алған. Сондай-ақ көрермендер фильм авторлары — Алихан Мухамеди мен Тулеуова Аяжанның еңбегін жоғары бағалап, «сапалы әрі мағыналы дүние», «әкеге деген құрмет пен махаббаттың көрінісі» екенін жазуда.