Ринат Зайытов: оқушылардың тәртібі мұғалімге ғана емес, бүкіл қоғамға байланысты

Мәжіліс депутаты Ринат Зайытов қазіргі қоғамдағы мектептегі тәртіп пен мұғалім беделіне қатысты пікір білдірді, деп хабарлайды Ait Media. Оның айтуынша, бүгінгі таңда оқушылардың мұғалімдерді тыңдамауы немесе ата-аналардың мұғалімдерге жиі шағымдануы сияқты жағдайлар бар.

«Бар ондай. Сондықтан біз педагог мәртебесі туралы заңды қабылдап жатырмыз. Бұл заңның мақсаты – мұғалімдердің беделін көтеру, оларды қорғау», – деді ол.

Алайда депутат бұл заң оқушылардың тәртібін тікелей өзгертуге бағытталмағанын атап өтті.

«Бұл заң оқушыларды мұғалімді тыңдауға тікелей әсер етпейді. Ол – мұғалімдерді қорғауға арналған», – деді Ринат Зайытов.

Журналистің «Оқушылар сабаққа құлақ аспаса, бұл жақсы үрдіс пе?» деген сұрағына ол мұны жағымсыз құбылыс деп бағалады.

«Әрине, бұл – жаман үрдіс», – деді депутат.

Бұл мәселені шешу туралы сұраққа Зайытов тәртіптің тек бір факторға байланысты емес екенін айтып, кешенді тәсіл қажет екенін жеткізді.

«Оны кешенді түрде түзеу керек. Ата-анадан бастап, учаскелік полиция, Оқу-ағарту министрлігінің бағдарламалары, ақпарат министрлігінің контенті – бәрі әсер етеді. Бала бір ғана себептен бұзылмайды, әртүрлі факторлар әсер етеді», – деді ол.

Депутаттың айтуынша, қоғамдағы тәрбиелік және ақпараттық орта да баланың мінез-құлқына тікелей ықпал етеді.