Регламентті бұзса, Құрылтай депутаты бір күндік жалақысынан қағылады

Құрылтайда Регламент бұзған депутат бір күндік жалақысынан айырылады, деп хабарлайды Ait Media.

Құрылтайдың жаңа Регламентінде депутаттық этика талаптарын бұзғаны үшін жауапкершілік те қарастырылған. Соның бірі - бір күндік жалақыдан айыру.

Ал бұл қанша теңге?

Бұл сұраққа Құрылтай вице-спикері Дания Еспаева жауап берді. Оның айтуынша, депутаттардың жалақысы еңбек өтілі мен қызметіне қарай өзгереді және шамамен 600 мыңнан 1 млн теңгеге дейін жетеді.

«Соны 24 күнге бөліп, бір күндік жалақысын есептеп көріңіз», - деді Дания Еспаева.

Мәселен, айлығы 1 млн теңге болатын депутаттың бір күндік жалақысы шамамен 41,7 мың теңге болады.