Орал қаласында полиция қызметкері қызды зорлады деген күдікпен ұсталды

mgorod.kz мәліметіне сәйкес, 25 жастағы Абай аудандық полиция бөлімі қызметкері зорлау ісі бойынша күдікке алынған, деп хабарлайды Ait Media. Қылмыс қызметтік міндетін атқару кезінде жасалған.

Алдын ала мәлімет бойынша, полиция қызметкері көршілердің пәтердегі шуға байланысты шақыртуымен барған. Пәтерге кіргеннен кейін ол сол жерде болған қызға қатысты қылмыс жасаған.

Қалалық прокуратура бұл ақпаратты растады. Аталған факті бойынша қылмыстық іс қозғалып, тергеу амалдары басталды. Күдікті 10 тәулікке қамауға алынып, уақытша ұстау изоляторына қамалды. Ол ішкі істер органдарынан жұмыстан шығарылды.

Полиция қызметі ведомство қатарында заң мен тәртіпті бұзу қабылданбайтынын және мұндай әрекеттер қатаң түрде тоқтатылатынын мәлімдеді.