«NASA – Қарағандыда»: әйгілі астронавт Крис Хэдфилд Қазақстандағы сапары туралы айтты
Блогер әрі журналист Даурен Исагулов әйгілі астронавт Крис Хэдфилд Қарағанды қаласына бірнеше рет келгенін растады, деп хабарлайды Ait Media. Оған жауап берген Крис Хэдфилд NASA-дағы жұмысы мен Қазақстандағы ғарыш бағдарламаларымен байланысын егжей-тегжейлі түсіндірді.
Крис Хэдфилд – XXI ғасырдағы ең танымал астронавттардың бірі. Ол 2013 жылы Халықаралық ғарыш станциясының (ХҒС) алғашқы канадалық командирі атанып, әлемге кеңінен танылды. Оның ғарыштан түсірген видеолары мен ХҒС-тағы күнделікті өмірді көрсететін жазбалары миллиондаған көрермен жинаған.
Ол 1990-жылдары NASA-ның Ресей мен Қазақстандағы операциялар жөніндегі директоры болғанын айтып, Байқоңырдан ұшырылатын барлық миссиялар мен қону процестеріне жауап бергенін атап өтті.
Хэдфилдтің айтуынша, ғарышкерлер Халықаралық ғарыш станциясынан оралған кезде көбіне Қазақстан даласына – кең, бос аймақтарға қонады. Қону орындары алдын ала мұқият таңдалып, адамдар тұратын аймақтарға қауіп төндірмеу үшін арнайы «полигондар» белгіленеді. Алайда ең маңызды мәселе – қауіпсіздік пен медицина.
«Егер ғарышкер қону кезінде немесе қайта кіру процесінде жарақат алса, оған шұғыл медициналық көмек қажет болады. Сондықтан біз ең жақын әрі ең сенімді ауруханаларға жылдам қол жеткізуді алдын ала жоспарлаймыз», – деді ол.
Сол себепті NASA мамандары Қарағанды қаласына бірнеше рет келіп, жергілікті ауруханалар мен медициналық орталықтардың жағдайын тексерген. Хэдфилд NASA дәрігерлерімен бірге өңірдегі негізгі клиникаларды аралап, ғарышкерлерге шұғыл көмек көрсетуге қаншалықты дайын екенін бағалағанын айтты.
«Бұл – сенім мен әріптестік орнатудың бір бөлігі болды. Мен Қарағандыда бірнеше күн өткіздім, және ол жер маған өте жылы әсер қалдырды», – деп еске алды астронавт.
Хэдфилдтің айтуынша, Қазақстандағы қону жүйесі мен медициналық инфрақұрылым NASA үшін стратегиялық маңызды болған. Сондықтан Қарағанды тек ғарыш миссиялары өтетін аймақ қана емес, сонымен бірге халықаралық деңгейдегі қауіпсіздік және медицина логистикасының бір бөлігіне айналған.
Поделиться
