Құтқарушылар мұзды суға түсіп кеткен итті құтқарып қалды

Астанада құтқарушылар мұзды суға түсіп кеткен итті құтқарып қалды, деп хабарлайды Ait Media.

Астана қаласы Төтенше жағдайлар департаментінің ресми мәліметіне сәйкес, 5 сәуір күні таңертең Сарайшық көшесі маңында, Арқар көпіріне жақын жерде Есіл өзенінде ит мұз ойығына түсіп, мұзды суда қалып қойған.

Оқиға орнына ТЖМ жедел-құтқару жасағының мамандары аэрoқайықпен жедел жетті. Бұл техника мұз бен су жағдайында тиімді жұмыс істеуге арналған. Жоғары өтімділігі мен маневрлігінің арқасында құтқарушылар қысқа уақытта жетіп, құтқару жұмыстарына кіріскен.

Арнайы құрал-жабдықтар мен сақтандыру арқанының көмегімен мамандар итті мұзды судан шығарып, жағаға жеткізді.

Желі қолданушылары құтқарушылардың әрекетіне жоғары баға беріп, алғыстарын білдіруде. Пікірлер арасында: «ТЖМ қызметкерлері – нағыз батырлар!», «Адам өмірін ғана емес, жануарларды да құтқару – үлкен жүректің белгісі», «Рақмет құтқарушыларға!», «Жарайсыңдар, нағыз кәсіби мамандар!» деген жылы лебіздер көп. Кейбір қолданушылар құтқару сәтіндегі шеберлікті ерекше атап өтіп, оны «лассо тастаған ковбойдай» деп сипаттаған.