Қазақстанда балаларды қорғаудың жаңа бірыңғай жүйесі енгізілуде

Қазақстанда балаларға қатысты зорлық-зомбылық, қатыгездік және жәбірлеу жағдайларына жедел әрекет етуді қамтамасыз ететін бірыңғай ведомствоаралық алгоритм бекітілді, деп хабарлайды Ait Media. Бұл туралы Қазақстан Республикасының Оқу-ағарту министрлігі жариялады. Жаңа жүйе «Құқық бұзушылық профилактикасы туралы» Заңды іске асыру аясында енгізіліп отыр.

Құжатқа сәйкес, енді полиция, білім беру ұйымдары, медицина қызметкерлері және қорғаншылық органдарының міндеттері нақты бөлінген. Баланың құқығы бұзылуы туралы кез келген ақпарат түскен сәттен бастап автоматты түрде әрекет ету тізбегі іске қосылады.

Жүйедегі басты жаңалық — кейс-менеджерлер институтының енгізілуі. Әрбір анықталған жағдай бойынша жеке жауапты маман бекітіледі. Ол барлық қызметтердің жұмысын үйлестіріп, баланың жағдайы толық қалпына келгенге дейін сүйемелдеу жүргізеді.

Сонымен қатар, әрекет ету мерзімдері нақты бекітілген: ақпарат дереу тиісті органдарға жеткізіледі, 1 сағат ішінде уәкілетті құрылымдарға жолданады, 1 жұмыс күні ішінде кейс-менеджер тағайындалады, ал 3 жұмыс күні ішінде материалдар комиссия қарауына берілуі тиіс.

Енді балаларға қатысты сигналдар тек ресми өтініштер арқылы ғана емес, «111» байланыс орталығы, әлеуметтік желілер мен БАҚ мониторингі арқылы да қабылданады.

Балаларға медициналық, психологиялық, әлеуметтік, педагогикалық және құқықтық көмек бірыңғай стандарт бойынша көрсетіледі. Сондай-ақ қорғау шаралары тек зорлық-зомбылық көрген балаларға ғана емес, оның куәгерлеріне де қолданылады.

Жаңа жүйе ведомстволар арасындағы үйлесімділікті күшейтіп, бала құқықтарының бұзылуына жедел әрі кешенді әрекет етуді мақсат етеді.