Басында барлығы аяп еді, енді сынға ілінді: Бораттың әніне билеген Кампергини
Америкалық тревел-блогер Коннор Кампергинидің Қазақстанға сапары әлеуметтік желілерде үлкен талқылауға себеп болды. Ол Қазақстандағы сапарынан “Борат” фильмінің музыкасын қолданып видео жариялаған. Осы әрекеті үшін блогер әлеуметтік желі қолданушылары тарапынан сынға ұшырады, деп хабарлайды Ait Media.
9 сәуірде блогер Қазақстаннан түсірілген алғашқы даулы видеоларының бірін жариялады. Видеода ол өз көлігіне көрермендерге тур жасап, оқиғаны сарказм тонындағы дауыста жеткізген. Ең көп сын тудырғаны - фондық музыка ретінде “Борат” фильмінің саундтрегінің қолданылуы. Қолданушылар бұл әрекетті Қазақстанға деген құрметсіздік ретінде қабылдады.
@camperghini This is my house, entry please 🤣 #borat #kazakhstan #lamborghini #housetour #viral ♬ original sound - CAMPERGHINI
Ал 12 сәуірде Коннор Қазақстан табиғатында әйелімен стейк әзірлеп жатқанын көрсетіп жаңа видео жариялап, видеода олар “Wawaweewa” фразасын қайталай айтқан. Бұл тіркес “Борат” фильміндегі басты кейіпкер Борат Сагдиев арқылы танымал болған.
@camperghini Wawaweewa 🤣 #camperghini #kazakhstan #travel #lamborghini #borat ♬ original sound - CAMPERGHINI
Айта кетсек, “Борат” фильмі Қазақстан кинотеатрларында прокатқа шықпаған, себебі ол билік тарапынан елдің беделіне нұқсан келтіретін және Қазақстанды бұрмаланған түрде көрсететін туынды ретінде бағаланып, теріс реакция туғызған.
Threads пен басқа платформаларда бір бөлігі блогердің контентін елге деген құрметсіздік деп бағалап, оның “Борат” стиліндегі видеоларын сынға алды.
Қолданушылардың бірі былай деп жазған:
“Қазақстанға келіп, Боратты пародиялап, сол арқылы күлкі қылып, бізді түгел Борат сияқты ел ретінде көрсетіп жүргендей әсер қалдырады. Полиция оны сүйемелдеп жүреді, ал олигархтар шапан жауып, сый-құрмет көрсетеді. Енді оған мемлекет есебінен пәтер мен азаматтық берерміз?”
Тағы бір пікірде:
“Америкалық блогер Қазақстанды әр видеосында Борат стилінде келемеждеп, мазақ қылғандай контент түсірген. Соған қарамастан оны дастарханға шақырып, шапан жауып, құрмет көрсеткен. Ал Министрлік оны ресми түрде шақырмаған, сонда да "жеткілікті деңгейде" қолдау көрсетілмегіне және келуінің себебі неде деген сұраққа ренжіген.”
Сондай-ақ тағы бір қолданушы:
“Ол Қазақстанды Борат стилінде келемеждеп, контент жасайды екен, ал кей блогерлер мен инфлюенсерлер оны қатты қолдап, оған ерекше жағдай жасап, хайп қуып кетті.”
Оқиға желісі
"Бізді күтіп алмады": Қазақстанға реніш
Осыған дейін Коннор Кампергини Қазақстанға келгенін, дегенмен өзін ешкім күтіп алмағанын айтып, әлеуметтік желіде видео жариялаған еді. Оның айтуынша, Туризм министрлігі туристерді қарсы алатын топты жіберуді ұмытып кеткен. Видео астындағы жазбасында ол өз ренішін де білдірген болатын:
Өкінішке орай, Қазақстанда біз көп уәде мен сөзді естідік, алайда оны жүзеге асыру мен орындау деңгейі өте төмен болды.
Бұл көңіл қалдыратын жағдай.
Әсіресе, бұл елде менің шынайы керемет адамдар болып табылатын көптеген достарым бар екенін ескерсек, бұл жағдай тіпті өкінішті.
Алагөзовтердің қонақжайлылығы
Қазақстандықтарда аяныш сезімін тудырған жазбадан кейін, Алагөзовтер отбасы өз үйінде танымал америкалық тревел-блогер Коннор Кампергиниді қонақ қылды.
Тұрсынғали және Баян Алагөзовтер блогерді ұлттық киімде қарсы алған. Сондай-ақ қонақты ұлттық киім киген қыздар киіз үйде күтіп алып, қазақтың дәстүрлі тағамдарын ұсынған.
Кездесу барысында Коннор қазақтың ұлттық тағамдарынан дәм татып, ерекше ықыласпен қабыл алғаны байқалады. Оған сый ретінде шапан жабылып, ұлттық әшекей бұйым да тарту етілді.
Министрліктің пікірі
Алдымен Қазақстан Туризм министрлігі блогердің елге ресми түрде шақырылмағанын мәлімдеді. Ведомствоның айтуынша, тек Kazakh Tourism арқылы шетелдік инфлюенсерлермен жұмыс аясында байланыс орнатылғанымен, тараптар арасында нақты келісімдерге қол жеткізілмеген.
Алайда кейін блогер мен ресми өкілдердің кездесуі түсірілген видео жарияланды. Видеода Коннор Кампергини өз көлігіне тур жасап, сапар тәжірибесін таныстырады.
Поделиться
