Астанада қазақстандық әйел «бостондық неке» форматында бірге тұруға әйел іздеп жатыр

Астанада тұратын қазақстандық әйел әлеуметтік желіде ерекше ұсыныс жасап, көпшіліктің назарын аударды, деп хабарлайды Ait Media. Ол баласы бар әйелді бірге тұруға шақырып, «бостондық неке» форматында өмір сүруді ұсынған.

Бостондық неке (Boston marriage) — романтикалық қатынассыз, қаржылық тәуелсіздік, өзара қолдау және мансаптық даму мақсатында бірге тұратын екі әйелдің серіктестігі. XIX ғасырда АҚШ-та пайда болған бұл модель, қазір Қазақстанда әйелдердің ер адамға тәуелді болмау, қауіпсіздік және ортақ мақсаттар үшін бірге тұру тренді ретінде танымал болып жатыр.

Жарияланған жазбада автор өзін қиын жағдайда жүрген, баласы бар әйелдерге көмектескісі келетінін атап өткен. Оның айтуынша, бірге тұратын адамға тұрғын үй мен азық-түлік өз есебінен қамтамасыз етіледі, ал киім-кешек пен дәрі-дәрмекке мүмкіндігінше қолдау көрсетіледі.

Сонымен қатар, ол кейде балаларды қарап беруге көмектесу қажет болатынын айтқан:

«Мен баласы бар қызбен бірге тұру үшін “бостондық неке” форматында бірге өмір сүруге серіктес іздеймін.

Тұрғын үй мен азық-түлікті өзім қамтамасыз етемін, дәрі-дәрмек пен киім-кешекке мүмкіндігінше көмектесемін.

Егер сен қиын жағдайда болып, балаңмен бірге болсаң, осындай нұсқаны ұсына аламын.

Кейде қажет болған жағдайда балаларға қарап беру жағынан көмек керек болады, бірақ бұл тұрақты емес.

Менің өзімнің екі балам бар: 5 жастағы қызым және 3 жастағы ұлым. Екеуі де балабақшаға барады, көңілді, күн тәртібін сақтауға тырысамыз.

Сонымен қатар, өзім білетін нәрселерді үйретіп, кеңес беруге, кей кездері сен душ қабылдап немесе өз істеріңді уайымсыз істей алуың үшін бала күтіміне де көмектесуге дайынмын», — деп жазды автор.

View on Threads

Бұл жазба оқырмандар арасында қызу талқыланып, пікірлерде көпшілік өз өміріндегі қиын кезеңдермен бөлісіп, бір-біріне қолдау білдіріп жатыр. Желі қолданушылары «Өте жақсы бастама», «Керемет идея екен», «Осындай адамдар көбейсе екен», «Жүрекке жылу береді», «Нағыз қолдау мен мейірім үлгісі» деп жазуда.

Айта кетейік, бұған дейін танымал режиссер Ақан Сатаевтың бұрынғы жары Назира Бақытжанова да «бостондық неке» форматында өмір сүріп жатқанын айтқан болатын.